தூத்துக்குடி மீனவர் வலையில் சிக்கிய அரியவகை நண்டு!

தமிழகத்தில் தூத்துக்குடி மீனவரின் வலையில் “ஸ்பேனர் நண்டு” எனப்படும் அரிய வகை நண்டுகள் பிடிபட்டுள்ளன. இனிகோ நகர் மீனவர்கள் மீன் பிடித்துவிட்டு திரும்பிய போது வலையில் சிவப்பு நிற நண்டுகள் இருப்பதை பார்த்து ஆச்சர்யம் அடைந்தனர். இந்த நண்டுகள் ஸ்பேனர் எனப்படும் அரிய வகை நண்டுகள் என்பது தெரியவந்தது. இவை மன்னார் வளைகுடா பகுதியில் கிடைப்பதில்லை. முதல் முறையாக தற்போது கிடைத்துள்ளன. இந்த வகை நண்டுகள் 20 முதல் 100 மீட்டர் ஆழத்தில் வசிக்கக்கூடியவை. மற்ற நண்டுகளை போல் இல்லாமல் இவை மண்ணில் புதைந்து வேட்டையாடும். பிலிப்பைன்ஸ், ஜப்பான், வியட்னாம் மற்றும் இந்தியப்பெருங்கடல் பகுதிகளில் இந்த வகை நண்டுகள் அதிகம் காணப்படுகின்றன. வெளிநாட்டில் வசிப்பவர்கள் இந்த நண்டை விரும்பி சாப்பிடுகின்றனர். ஆனால் நம் நாட்டில் இந்த நண்டை உணவுக்காக பயன்படுத்துவது இல்லை. ஆஸ்திரேலியாவில் தான் அதிக அளிவில் உண்கின்றனர். பருவ நிலை மாற்றம் காரணமாக தூத்துக்குடி கடல் பகுதிக்கு இந்த நண்டு வந்திருக்கலாம் என்று மீனவர் ஜெயசிங் கூறினார்.